Istori an Bibel Kernewek
History of the the Cornish Bible
(for English version, click here)

2. An Dasserghyans
Yn 1904 Henry Jenner a dhellos y 'Handbook of the Cornish Language', hag y synsir hemma dhe verkya dalleth an dasserghyans.  Jenner y honan a dreylyas Mark 1-4.25 , ha wosa R.M.Nance dhe dhevisya Kernewek Unys, Jenner a dreylyas Yowann 5.1-14 ynwedh.  Wosa henna ny hwarva travydh bys dhe dreylyans A.S.D.Smith a Aweyl Mark dyllys yn 1936 - an kynsa lyver biblek kowal bythkweth dhe vos dyllys yn Kernewek (amendyans anodho a veu dyllys gans E.G.R.Hooper yn 1960; ha tressa, selys war an Greka re beu pareusys lemmyn rag an Projekt ma).  Wosa powes hir a dhew-ugens blydhen, treylyans an revrond D.R.Evans a Aweyl Matthew a sywyas (hemma ynwedh re beu amendys lemmyn herwydh an Greka rag an Projekt ma).  Ruth, Filemon, Obadia, Yona (treylys gans E.Chirgwin) ha 1 Peder (gans D.A.Trevanion)  a sywyas, mes  ny vons dyllys.  Yn 1974 Konsel Epskop Truru rag Servisyow y'n Yeth Kernewek a settyas dalghenn y'n mater, ha wosa henna yth esa treylyansow moy ow sywya:  Awayl Jowan (J.Page, 1984); Awayl Luk (E.G.R.Hooper, 1989) ha Dysquedhyans Jowan hag Unnek Epystol (R.J.Edwards, dyllys gans KDL, 1986).

3. An Projekt Ma
Yn mis Du 1996 Konsel Epskop Truru rag Servisyow y'n Yeth Kernewek a ordenas Seminar yn Sen Ostel, hag apoyntya Kesordener dhe avonsya an ober; ha dhe'n kynsa prys, ervirys veu pub treylyans dhe vos selys stroth war an Greka po an Ebrow.  Rakhenna res vydh re a'n treylyansow a-varra (avel Matthew, Mark) dhe vos amendys herwydh an Greka, ha re erell (avel Yowann, Luk, Ruth, Filemon, Obadia, Yona) dhe vos dastreylys.  Yn keth termyn, ervirys veu kowlwul an Testament Nowydh ha'y dhyllo erbynn 2004, kansblydhen lyver Jenner.  An amkan na a veu kollenwys gans y dhyllans gans Kesva an Taves, ha’y lonchya yn Eglos Sen Petrok, Bosvenegh, yn mis-Est 2004.  Dasskriv kelmys yn arbennik a veu res dhe Archepskop Kargens yn solempnyta yn Penneglos Truru yn mis-Du 2004.   Yn kas an Testament Koth, yma kals a ober hwath dhe vos gwrys, mes ober a yn rag yn lent, ha'n lyvrow a vydh gwrys moy po le herwydh aga ragwir.  An tekstow may selyn an ober warnedha y'n Projekt yw:
         K.Elliger, W.Rudolph, Biblia Hebraica Stuttgartensia, 1990
         A.Rahlfs, Septuaginta, 1935
         Nestle, Aland, Novum Testamentum Graece, 27ens dyllans, 3a pr., 1995
         G.H. Gwilliam, J. Pinkerton, J. Gwynn &c., Peshitta, United Bible Societies 1979

Gwartha/Top